ياحمامه

روحي نويت أروح لا لا تردين = روحي نويت أروح ومع السلامه
روحي كفاية جروح ما فيه بعدين = الحين روحي وان رجعنا ملامه
اذا تعبتك بعد ما فات مسكين = مسكين ما يقدر يثبت كلامه
مدام صرتي في غلانا تخونين = نساك قلبي وانتي اول غرامه
انا عزيز النفس وانتي تعرفين = ان الخضوع براي مثلي رخامه
لو اعتذرتي غير هالعذر عذرين = طرتي من اقصون الغلا يا حمامه
لو كنتي أغلا شوي عندي من العين = من خانني عندي تحطم مقامه
روحي بمان الله عسى ما تعودين = فطمت قلبي وأكمل الله فطامه
لو كنتي اول تاج كل المزاين = وكنتي هوا قلبي وكنتي هيامه
وكنتي غلا نفسي وحلمه بسنتين = وحلمن على عقلي من احلا حلامه
وكنتي هواي وكنتي اغلا المحبين = وكنتي هوا بالي وكنتي مرامه
واليوم لو انك بجنبي تمرين = غلاك ما تلقين ربع احترامه
انا نسيتك وابعدي لا تقولين = حطيت من بينك وبيني علامه
علامة الفرقا وكلمة بقوسين = انك ندامه وانك اكبر ندامه
والله لو زينك عليه البراهين = وأجمل جمال الكون شرقه وشامه
خلاص في عيني فلا عاد تسوين = طحتي من القمة لقاع الملامه
خلاص لا يطريلك انك تردين = مع السلامة بعدك اكبر سلامه